السلام
عليكم انا فاطمه عمري 19والحمد لله اني قادره نحكيلكم قصتي اليوم .. انا
ماما سميتها زهره و بابا سميتو احمد و عندي جوج خوتي كبار عليا انا البنت
الوحيده فالدار ..عشنا و مخسنا خير كلشي موجود الحمدلله ..عائلة بابا كلها
عايشا في الخاريج
كنت انا
الفتاة الوحيده فالبلاد و الصغيره بين بنات عمامي...باش منكترش
عليكوم..كيعودو لي اني ملي تولدت طلبت مرة عمي من ماما ترفدني و ديرني
فالحاله المدنيه معاها و تديني نعيش فالمانيا معاها و لكن ماما مبغاتش ..و
انا ملي گالوها فرحت ملي متخلاتش عليا ماما و عطاتني
و مفرحتش
ملي بقيت عايشا هنا بالعذاب..كنت عيشا بحال ما عيشاش غتكونو گتقولو مع
ريوسكوم مالها شنو خاصها هممم..انا كان خاصني حنان امي ..انا عشت مظلومه
فحياتي ..تخيلوا كنت..
الجزء 2:
تخيلوا
كنت صغيره و ماما كانت ما تعبرش وجودي ..كان ديما خويا الكبير هو قره عينها
..كان ملي توقع شي حاجه انا ناكلهوم..و انا عندي 12 لعام نجي من المدرسه
باش ناكل و نولي مع
2 ما
نلقا ما ناكل و تقولي دير نيت راكي بنت و هي ديما لاهيا مع جوج خوتي لي
كبار عليا فين ما خاصهوم شي حاجا جاتهوم ..منكدبش عليكوم بابا كان احسن اب
في العالم ..كنت نود مع 7 صباحا و نلقاه وجدلي لفطور و يعطيلي درهم باش
نشري شي حاجه اه درهم..و ماما ناعسه ..كبرت على هاد النحو ديما كنتلقا
العاطفه من بابا و كنحس بأنو كيبغيني كتر من ماما ..وصلات عندي 18وكنقرا في
الباك و كبرت على الضرب من ماما ديما طوابع ديال الضريب فيا .. كان ملي
خويا عندو يقرا ف الجامعه اقسم بالله العظيم كانت تفيق بكري و توجد ليه اش
خاصو و توصل معاه حتال الباب و تقول ليه سير اولدي الله يرضي عليك ..انا
بنتها الوحيده و عمرني سمعتها منها ..المهم كي قولت عندي الباك و كنت كنحلم
غير باش نهزو
الجزء 3 :
كنت
مجتهده الحمدلله ..و عمرني مخرجت من طريق ..ولكن اضطريت ملي اكونو عندي
سواياع خاويين نخرج مع صحاباتي نتمشاو حيت ماما مكانتش تخليني نخرج و لا
نمشي عند شي صحبتي و خا هاكا معندي حتا شي مشكله انا اصلا عزيزه عليا الدار
حيت مولفه ..وحد النهار كان عندي الفرض في المات مع لعشيا و انا راجعه مع
12 قلت نراجع شويا قبل ما نمشي ندوز ..جبدت نخدم تمرين و ماما توقف عليا و
تقولي نودي ديري لغدا ره خوك خاصو ياكل ..قولت ليها ماما راه منقدش عندي
لمتيحان لعشيا ..و بدات كتهددني انها غتحرقري گاع هاد الدفاتر و تقولي واش
غاتجيبي گاع من هاد لقرايا..و انا فديك اللحظه تهدمت بديك الكلمه ..و بديت
نبكي گولت لا غنبقى نراجع و حنيت راسي بديت نكتب ..فلحظه و كنحس بحال تاحت
عليا دار ..كانت ماما ضرباتني بالبونيا فضهري .. الجزء 4:
بكييييت و
قولت علاش كديري معايا هاكا اش دارت ..و گالت كتردي عليا الهضره!!! و سدت
الباب و بقات عليا بالعصى واه كالعاده اكيد ..و مكنتش نغوت و لا يسمعو عندي
الجيران ..داك النهار تحرق ليا قلبي بزاف و عييت ما نصبر فالضربات و شعري
كاع نتفاتو و عضات ..فلحظه قولت دابا نموت
و عيت
خوووووووياااااا!!! و لكن مع الاسف كان خرج ..و عيطت عليه وخا انا عارفه
مغيفكنيش منها ..كملات ضريب شي نص ساعه و الله ..و عيطات عليها خت بابا ف
التيليفون باش اخرجو..لبسات جلابتها و قالت لي الئ مدرتيش لغدا رح لخبار
فبالك ..كنت عارفه اش غايوقع الا مدرتوش غير لعصى ..ندت و انا عامره كدمات و
عضه فالعنق و راسي لي تلطخ مع الارض .... و درت لغدا و انا كنبكي كنبكي
..كنبكي على ديك الكلمه لي قالت اش غاتجيبي من هاد لقرايا ..تهدمت .شفت
الساعه و لقيتها 2 و نصف مشيت كنجري للمدرسه و قدرت ندخل ..و صلت لقيتهوم
بداو فالفرض ..گلصت فبلاصتي و بديت نجاوب و انا كنبكي ..معرفتش درت گاع
فداك الفرض ..صحاباتي ما قديتش گاع نشوف فيهوم ..كانو فيا خبوشات فالوجه
...اما العضه غطيتها بواحد شال ..
الجزء 5:
ملي
ساليت الفرض ..كالعاده بداو اسولوني مالكي و اكيد لجاواب كيكون والو غير
تحط ..ولا خبشني ولد الجيران... حصه اخرى بالي مشغول بالتفكير واش غندير؟
علاش حياتي هكا دايرا؟ فكرت ننتحر نهرب من دار ؟؟ و لكين ماقيتش !!!!!!
داااازت ليام وجاتني الفكره اني نتقرب من ماما حيت شفت بنات عمي كي
كيتعاملو مع الامهات نتاعهوم و كيف ماهم كتعامل معاهوم واه غرت حيت انا
مكنعيش بحالهوم ..بديت كنرجع من المدرسه و كنمشي نبوسه زعمت نقرب اول مره
فحياتي نبوسه 18 لعام اول مره نشم ريحتها الزوينه ..اول مره ..و هي ماكانتش
تبغي تعطيني وجها باش نبوسها..تمنيت نبقا نبوسها و خا غير مره فالنهار لكن
هاد الوضع استمر غير سيمانه و تدهور الوضع ...و لاو عاود لغوات و الصداع
..واحد النهار علاحال غاتسالي الدوره الثانيه رجعت لدار و لقيها حرقات لي
گاع حوايجي و الكوتوب و الدفاتر ....: الجزء6:
تصدمت !!!!!اش درت اعيباد الله..علاش گاع هاكا ؟؟
ماما اش
هادا..قبل ما نسالي السؤال جبدات معايا بسقلا دوختني ..و اكتشفت انه دارت
هاكا حيت لقات بريا ديال صاحبتي ايمان لي كتعبرلي على مشاعرها ليا ..و هي
قرتها ايمن
عيت ما
نفهمها انها ايمان ماشي ايمن ما بغاتش تيق و مخلتليش حتا فرصه باش نهدر
..اقسم بالله هادي صاحبتي ايمان اعز صديقه عندي فديك الوقت كنا كنديروا
رسائل لبعضياتنا كنعبرو على الصداقه ديالنا..المهم حتى واحد ما بغى يتيقني
كليت لعصا من ماما و خوتي ..و بابا الوحيد لي كان ايتيقني كان فألمانيا مشا
يشوف خوتو ..خرجوني من لقرايا و كان الوطني على الابواب حياتي ديعات گاع
اش بنيت تهدم ..تكرفست مرضت نفسيا وليت حاله ..صافي بقيت غير معا الشقا ..
الجزء 7:
وحد
النهار اسمعت على غفلا ..ماما و خالتي گيهدرو ..خالتي گالت علاش متقوليلهاش
انتي ماشي بنتي ......اووووووو ركبيا مابقاوش قادين اوقفو ....تصدمت !!!!
اش كنسمع ..مع ديك لهدرا خرجت من الدار كنجري بلباس الدار و تشنكلا كنجري
كنجري بعدت بزااااف على الدار ..بقيت كنبكي و حالتي حاله لي ايدوز ايشوف
فيا .... حياتي دمرت ..وصلت 6 دلعشيا وليت للحومه ..و لكين ماقديتش ندخل
لدار ..قرقبت على واحد جارتنا كانت ظريفااااا..دخلتني ..هي كانت عالمه بگاع
اش كيوقع معايا ..المهم عطاتلي ندوش.. و رتاحيت شويا و دارتلي ما ناكل ..و
سولتها خالتي واش كاتعرفي بلي ماما زهره ماشي ماما ؟ بقات كتشوف فيا و
ساكتها !! سولتها عاود و الدموع كيهبطو ؟منبعد قالت گالت كنت قولت ليهوم
طالت ليام و لا قصارات غشادي تعرفي ..زادت كاملات عليا ملي عرفت بلي گاع
كيعرف غير انا ...و علاش ما قديتش نعرف هاد الشي ؟؟ و شكون انا؟؟ فين
عائلتي ؟؟؟ علاش ربتني ماما زهره؟؟؟ غنهبال ..شدت ليا فيدي و گالت زهره
بنتها الحقيقيه ماتت .. الي هيا ماماك في الحقيقه ..و انت رباتك
جداتك..ماماك ماتت مع ولادتك نتي ......صافي كنحس براسي غنتخنق .....
الجزء 8: و الاخير
اكبر
صدمه فحياتي ...حقيقه مؤلمه اني نعرف ماما مات بسبابي ..و اقرت انها تنجبني
و الاطباء خيروها بين حياتها و لا حياتي ...بديييت نبكي و نغاوت ماما ماما
!!!!
وهي
تقولي راه ماماك بغاتك بقلبها ها علاش ولداتك و راها ملي كانت حامله بيك
ديما كانت كتحلم بيك و تحكي لگاع الجيران بلي غتسميك فاطمه سميت ام جداتك
(ماماين بابا) ...و انا نقولها فين هوا بابا ...قاتلي راه ف فرنسا و راه
مكيعرفش بلي راكي عايشه ..حيت جدتك زهره ملي ماتت ليه ماماك مابغاتش يعرف
حاد بلي راكي عايشه ...المهم ....... ساعدتني هاد السيده الله اجازيها
بالخير نوصل لبابا و قديت نكمل قرايتي ف فرنسا و نعيش مع بابا و
جدي لي
كنت كنادي عليه بابا ديما كيجي لعندنا ...قديت نشوف صوره ماما و نبوس
فالصوره بعذاب و قديت نشم ريحة ماما فبابا ..حياتي بدات كتبدل شويا بشويا
... تخطبت لواحد السيد هطارو ليا جدي و فبلت عليه حيد جدي ما كاينش ما حسن
منو و طلع هاد الراجل ولد الاصل الحمد لله ..كنفكر باش نرجع للبلاد و نشوف
العائله خوالي لي كانو خوتي و جداتي لي كانت ماما ..ولكن ...الله
يقوينا ..حيت البصمه عاد ما تمحات . +تحليل قصص مغربية
Tags :
يقوينا ..حيت البصمه عاد ما تمحات . +تحليل قصص مغربية
Tags :
تعليقات
إرسال تعليق